(240) 27 August (27.08.)

 శ్రీ శారాద శ్యామ సందేశం: 27 Aug

నిలకడైన శ్రమ లేకుండా సంపద లేదు. సంపద లేకుండా శౌర్యం, శౌర్యం లేకుండా విజయం లేదు. దయ లేకుండా కీర్తి లేదు. ఆధ్యాత్మిక జ్ఞానం లేకుండా పరమానందం లేదు.

Without constant hard work there is no wealth. There is no valor without wealth, no victory without valor. There is no glory without grace. Without spiritual knowledge there is no bliss.

240) మేలుకో మేలుకో …. (27.08.)

ఉదయరాగం

మేలుకో మేలుకో ....

నాలోన నిండి యున్న ప్రాణదేవా, 

గురుదేవా, శ్రీ రామకృష్ణ మేలుకో

ఓం నమో భగవతే రామకృష్ణాయ 

కరుణాకరా ప్రభో శ్రీకరా  (పునరావృతం )

గురుదేవ, గురుదేవ, గురుదేవ, శ్రీరామకృష్ణా

(పునరావృతం)

కరుణాకరా......... గురుదేవా.........

మావలె పుట్టితివి, మావలె పెరిగితివి

మాకంటే భిన్నమగు సాధనలు జేసితివి (పునరావృతం)

పసిడి మనసును కలిగి మనుజులను గాచితివి

పసిడి మనసును కలిగి పతితులను గాచితివి

పరమాత్మ రూపిగా స్థిరముగా నిలిచితివి

పరమాత్మ రూపిగా స్థిరముగా నిలిచితివి

పరమాత్మ రూపివై భువిలో నిలచితివి

కరుణాకరా......... గురుదేవా..........

1.శారదా మాతను పెండ్లి యాడి

నిజమగు సంసార మొనరించినావు

సంసారిగా యుండి తరియించు మార్గమును

లోకముల కెల్లను ఎరుక పరచితివి 

ll కరుణాకరా ll

2.అమ్మా, అమ్మా, అమ్మా యనుచు

అమ్మా, అమ్మా, అమ్మా యనుచు

దరిశన మొసగి చేకొన మనుచు

ఆక్రోశించి, ఆక్రోశించి, ఆక్రోశించి

రోదించి, రోదించి, రోదించినావు

ll కరుణాకరా ll

3.ఎంత రోదించినను అమ్మ రాలేదాయే

కనుల కొకసారైనా కనిపించదాయె 

అంతు తెలియని బాధ అధికమై నొప్పింప

బండ నేలల పైన పొరలాడి ఏడ్చితివి

అమ్మా కనిపించవా, అమ్మా కనిపించవా

ఆకలి లేదు, నిద్దుర లేదు, 

పగలూలేదు, రాత్రీ లేదు

తనవారు లేరు, పెరవారు లేరు 

అమ్మ తప్ప తదితరమెవ్వరు లేరు

శోకమ్ము  లేదు మోహము లేదు

లౌకికత్వము నందు ధ్యాసయే లేదు 

అమ్మ దరిశనము ధ్యేయమే తపనయై

తపియించి, తపియించి, విలపించినావు

ll కరుణాకరా ll

 

4.మంత్రమేదియు లేదు, తంత్రమేదియు లేదు

ఏ గురువు నుండి ఉపదేశమే లేదు

అమ్మా కనుపించవే, అమ్మా కనుపించవే 

అమ్మా, అమ్మా, అమ్మా 

(గట్టి స్వరం ) ( పునరావృతం)

ll కరుణాకరా ll

5. అమ్మ కనిపించవే అను 

మంత్రంతోడ బ్రతిమలాడితివి

ఎంత చేసిన గానీ అమ్మ కనబడదాయె

ఆవేదనను చూడ అధికమధికమ్మాయె 

ఆరాటము చూడ అధికమాయే

ll కరుణాకరా ll

 

6.అమ్మ రాలేదేమి కనిపించదేమి

ప్రేమతో ఒడిచేర్చి దీవించదేమి 

అమ్మలేని బ్రతుకు వ్యర్థంబు గాదె 

అనుచు మరణించగా నిశ్చయించితివి 

ll కరుణాకరా ll

7.తల్లి కరమందలి కరవాలమును తీసి

మెడపై వేసుకొని మరణించ బోవగా 

కోటి సూర్యుల యొక్క తేజముతో కనిపించె

కరుణించె, కరుణించె, అమ్మ కరుణించె

సచ్చిదానందమ్ము నొసగి దీవించె

ll కరుణాకరా ll

8.మానవా తీతమగు సాధనల చేసితివి 

సకల దేవతల దర్శనమును బొందితివి

నారాయణుడవే నీవని తెలిపితివి 

పసి బాలకుని వోలె సంచరించితివి

 ll కరుణాకరా ll

9.పతితుల నెల్లరా పావనులుగా మార్చి

మధురమగు ప్రేమను మాకందరకు పంచి

భక్తి యొక్కటియే మనుజులకు శ్రేష్టమని

ఐక్యత కలిగెడి మార్గమది అన్నావు

ll కరుణాకరా ll

 

10.లోక హితమునకై అవతరించితివి

లోకోద్దారకుల సృష్టించితివి 

ప్రేమకు సాధనకు నిర్వచనమే నీవు

శ్యామచరణుని దయతో కృపజూడుమయ్యా

అంతరంగము నందు నిండియుండెడి దేవా

మేలుకో,  ఏలుకో, ఏలుకో మేలుకో

ll కరుణాకరా ll